SmartSection is developed by The SmartFactory (http://www.smartfactory.ca), a division of INBOX Solutions (http://inboxinternational.com)
نورياغدي آقا

نورياغدي آقا

 

نورياغدي آقا پيچاغيني چالغيم داشا چاليپ، يوُرت چاليپ گليأن قُربان قيليچ آدلي ساقغالداش دوستونينگ حورماتينا سؤووش سوْيماق اوچين قولاغي تأزه چأكله‌نن آلاجا دالغير چِبيشينگ اوچ آياغيني گـويلأپ، داماغيني چاليپ، پيچاق آووُسينا جيداماني چأبه‌له‌نيپ ياتان حيوانينگ جاني چيقاندان سوْنگرا قانيني يوُووُپ چالغي بيلن چالان اوتونينگ اوستونده ياتيريپ دريسيني يـوزمأگه دوردي. جانليني يـوزوپ بولاندان سوْنگرا قيراقدا قوْيدي-دا سويجي ايچه‌گيني ايچ ياغ، باغير، اؤيكِن، بؤورِك، دالاق، يورِك، يلينيني، كسيپ قابا سالدي. سونگرا چاتيلبيني گِرِسلأپ، ساغرينگ چويچوك‌ليگيندن كيچي‌جِك آي‌پالتاني ساليپ دؤشونه باريانچا ايكي بؤلوپ، قوْل-بوُت‌لاريني كسيپ، باريني كرسن-چاناق‌لارا سالدي-دا پيچاغيني يوُووُپ قينينا ساليپ، بير چاي‌ليق بولانميقا ديييأن سؤزي بيلن ميهمان بيلن آق‌اؤيه گيردي‌لر. نورياغدي آقانينگ قارتانگ عيالي نورتأچ اجه بوْلسا، آلاجا كتن ساچاغي تؤرده دوشأپ گؤك‌چاي، توُرشي چـويچـوك، گؤك اوزوم، پيوندي اريك، توُرشي ليمون، كـونجولي كسمك، توْشاپ‌لي ساري ياغ، سارغان يالي قوْيي قايماق، مله ميسسيق تامدير چؤره‌گي آرا گتيريپ ايچي تاويق تندن دوْلدوُريلان ياسسيق‌لاري تيرسِك‌له‌نيپ، اوُزانماغا اوْرتا اوْقلادي. ايكي دوست سويجي صؤحبت‌لي ايچن چاي‌لاري‌نينگ دمكش‌لري نأواغت بوْشانيني بيلمأنديرلر. يؤنه نورتاج اجأنينگ لاقيرداپ دوُران قارا تـونگچه و قالداولاردان سوْنگراقي دملأپ آرا گتيرن چاييني ايچن‌لريندن سوْنگرا مانگلاي‌لاري چيغجارماغا دوردي. شيله بير واغتدا هم قويون‌لار ياتاغا گلمه‌گينه گؤرأ، ايكي دوست چاي دوْغاسيني اوْقاپ: «قوْيوُن‌لارا آرالاشايلي!» دييپ، اؤيدن چيقدي‌لار. گؤرسه‌لر چوْلوُق اوْغلان اؤري ميداندا باقان يوْز قوْيوُن‌لاري گتيريپدير. بير آز ساليم گچندن سونگ، ساغيليان قوْيوُن‌لار هم ياتاغا گليپ، داشي چتي‌دن قابالان تگِنه گيردي. ساغينچي گلين-قيزلار نورتأچ اجه بيلن چوْلوُق و چاغالارينگ توُتوُپ گتيرن قويون‌لاريني ساغيپ تِگِندن چيقاردي‌لار. قويون‌لار ساغيليپ آزالديغيچا توُتماغي قين بوْلوُپ گرگه‌نِك بيلن توتوپ ساغيليپ باياندان سوْنگرا گـونه‌ي‌ده باقيليپ يؤرن قوُزوُ‌لاري دپأنگ آرقاجيندان انه‌لرينه قارشي اِميشديرمأگه گؤيبردي‌لر. قوُزوُلارينگ چوْزوُپ مألأپ قايديشيني گؤرِنگده بير قوْشوُن اوْرداسي‌نينگ دوُشمانا قارشي چوْزوُپ الدن تالانان زاديني اله گتيرن سوْنگ ييتگي‌نينگ ايزيندا گزيشي يالي قوُزوُلار هم انه‌سيني تاپجاق بولوپ، بوُ قوْيوُن‌دان اوْل قوْيوُنا سـومسـونيپ انه‌سيني اِممأگه دوُريار. انه‌سي بوْلسا قوُزيني ايسغاپ اؤز قوُزوُسي بوْلماغيندان گؤوني جاي بوْلاندان سوْنگ سويت دامارلاريني قاوشاديپ سـويدوني اييديريأر. واغتي خوْش بوْلوُپ دوُران نورياغدي آقا بيلن قُربان‌قيليچ آقاني نورتأچ اجه: «باغير اؤيكِن‌لي باتيرما بيشيرديم. گلينگ ناهارلانينگ!» دييپ، اؤيه چاغيرماغي بيلن، ايكي دوست ينه بير گزِك ساچاق باشيندا اوْتوردي‌لار. چؤرِك باتير ناهاري ايييپ، دوْغا اوْقيلاندان سوْنگ، نورياغدي آقا قُربان‌قيليجا يـوزله‌نيپ: «اييِن داماغيميزي سينگديرمأگه بير گؤك چاي بيلن آرانگ بارمي؟» دييپ سوْراشاندا، دوْستي: «مِنأ توركمنينگ دوْيان يرينگده دوْقلوُغينگي سينگديرمه، ديين مثلينه گؤرأ، يوُرت چاليپ نصيب بوْلسا گـون باتماقا، اوْباميزا آشماغا يوْلا دوشسم اوْنگات بولارميقا ديييأن، يؤنه ايين زوْرلي داماغيميز چؤلده سوُوساتمازليق اوچين بير كأسه چايا يارتي قالام قوُروُق ياغ آتيپ چاي چوْربا اديپ برسه‌نگيز ايچيپ يوْلا دوشه‌يين» دييپ، چاي چورباني قيزغين‌ليغي بيلن باشينا چكدي‌-ده آطيني ايِرلأپ: «خوش الله يارينگيز!» سؤزي بيلن يوْلا دوشدي. نورياغدي آقا ميهماني يوْلا ساليپ گؤك چايي ايچيپ اوْتيرقا عيالينا بريأن گـوررونگده: «قُربان قيليجا گيتدي، يؤنه خداي بيزي ميهمان‌سيز قوْيماز، ينه بيزي يادلاپ گلن دوست-يار تاپيلار» دييپ، دوش آلماق اوچين اوُزاندي.

دولت‌لي مالدار نورياغدي آقانينگ ميهمان سؤيِرليگي «ميهمانينگ ايرسغالي اؤزوندن اؤنگ گلر» دييلن مثليني يادا ساليار. منينگ پيكريمچه توركمن خلقي‌نينگ بو عجايب ميهمان سؤيرليك دأپ‌لري هر بير ايلده تاپيلماغي قين بوْلسا گرِك.

 

  این مقاله را با فرمت PDF نشان بده چاپ مقاله فرستادن مقاله