SmartSection is developed by The SmartFactory (http://www.smartfactory.ca), a division of INBOX Solutions (http://inboxinternational.com)
باهار

                                                

باهار

 

باهار آيي دييسِنگ گؤركلي اِكِن. طبيغاتينگ صونغاتينا پيكير اديپ اوْتوُرشيما هِوِس‌له‌نيپ بيردن ايكأ يـوره‌گيم موج اوُروُپ چاي چؤره‌گيمي ايچيپ- اييپ بوْلامدان سوْنگ، آل دِپِل سِكِلجه آطيمي اِيِِرلأپ، مينيپ يوْلا دوشدوم. منينگ ماقصاديم ماسان دره‌سي‌نينگ بوْيوندا اِكِن. دأنه اِكِرانچيليغيمي ياقيندان سر اديپ‌-ده «يازگلدي آقا»نينگ قوْيوُن باقيان چاروا اؤيـونه ميهمان بوْلماقدي. شهردن ايندي سايلانيپ چيقان واغتيم ايلكي گؤزوم دوشِن چوْپانلارينگ بيري يدي بوْغوُن تـويدوگيني اِلكين قوْشوُني يـوكلأپ باريان آق آيغير اشه‌گي‌نينگ اوستونده چاليپ-دا قوْيوُنلاري بوْلسا تأزه اوُربان قوُزوُلاري بيلن گؤك ياشيل قيرتغيچ ياز اوْتوُنگ اوستونده اوْيناپ بؤكوپ يؤرِنلرينه گؤزوم دوشدي-‌ده طبيغاتينگ حكمتينه پيكير اِده- اِده اوُغرا برديم.

باهار طبيغاتي بيزينگ قارا توْپراق ميدانلاريميزا هم عاجاييپ گؤركوني ساچان اِكِن. هر يره سر اتسنگ گؤك ياشيل بوْلوُپ، ياز يلينه ايغشيلداپ اوْتوُران آرپا- بوُغداي اِكين‌لري گؤرسِنگ بوْلجاق. دِره- دِپه بوْيوندا هم لأله و هر تـويسلي رنگكده آچيلان گـول‌لر تأزه اؤسـوپ باريان جوان گلين قيزلارينگ بوْينوندان آسان قيزل، ساري،  ماوي موْنجوُقلاري يالي، باهار طبيغاتينا آيراتين بير گؤرك بريپ حُسنيني مـونگ‌لرچه آرتيق اديپ‌دير. منينگ آطيم سلكيلدأپ يوْل يؤريسه-‌ده گـون اوْرتادان ايندي آغان زماني يازگلدي آقانينگ ياز يوُرت‌لي قوْيوُن اؤيونه باريپ دوشدوم. آطيمي اؤيونگ قايرا ينگسه‌سينده قازيغا باغلاپ، اييم توْرباني چيتمه خوْرجوُندان آليپ اؤيله اييميني برديم-ده يازگلدي آقانگ اؤيونه سلام بريپ گيرديم. ياز گلدي آقانينگ قارتانگ عيالي قُربان‌تأج اجه بوْلسا: «و عليكم السلام» ديپ تؤره گچمك حؤزيريني اتدي. اوْتوُريپ آمان-ساغليق سوْراشامدان سوْنگ: «هاني يازگلدي آقا گؤرونمه‌يار‌ا؟» دييِمده، «يازگلدي آقا-دا چوْپانلارينگ چاي- سـويدوني بريپ قوْيوُنلاريني اوروزمأگه يانگجا دره‌دن ايندي. مگر بوْلسا بير آز واغت‌دان گلسه گِرِك» ديپ، بير دمكش چاي بيلن تأزه اوْجاقدان چيقاران گؤممه چؤره‌گي‌نينگ كـولـوني قاقيپ بير اوْقاراني دوْلدوُريپ ساري آويز يالي بوْلوُپ قاينان قوْيوُن سـويدي بيلن بير كأسه قايماغي اؤنگومده قوْيدي-‌دا قايناپ دوُران قارا قازاني اوچ آياقلي تاغانينگ اوستـوندن يره دوشـوردي. من هم بوْلسام باهار طبيغاتيندان اؤزومه يِتِن ايلكي ساوغاتي بيلن ماشغول بوْلوُپ اوْتوُرشيما يازگلدي آقانينگ ايشيكدن آشيپ اؤيه گله‌نيني بيلمأنديرين. يؤنه اوْنوُنگ: «بأ منينگ عزيز شاهير دوْستوُم گلن يالي» ديين سؤزونه يريمدن توُروُپ سلام بريپ گؤروشديم. يازگلدي آقانينگ يـوزي-گؤزي هم لأله گـولـونگ آچيلشي يالي دييسِنگ نوراني بوْلوپ دير. دييمك بيلن، من يازگلدي آقاني قيشينگ اوْرتاقي آييندا بازارا آزيق آلماغا گِلِن واغتي گؤرِم-‌ده اوْنوُنگ سيراتيندا بيله ياغداي دوُيماپديم. يؤنه طبيغاتينگ باهار دييپ ايبِرن ساوغاتي‌نينگ بيري چؤل ميدانلارا بِرن عاجاييپ گؤركي دييسك-‌ده حيوان، انسانلاردا هم گؤرمِك بوْلجاق‌ليغينا  گؤزوم يتدي.

 

باهار، آدينگ باش دفتره آچيلدي
باهار، جلوأنگ چؤل ميدانا ساچيلدي
اوْن ايكي آي بوْلان بير ييل ايچينده
اوچ آيي باهار ديپ آدينگ سِچيلدي

باهار ييل باشي، سن جهانينگ گؤركي
بريلِندير سانگا طبيغات اِركي
بركت‌لي ياغمير ياغيپ قيش آيي
گؤك ياشيل گـول‌لردن دوْنوُنگ بيچيلدي

دايخانلار هم گلمه‌گينگه قاراشيپ
قيش سؤوِش‌لي مالدار ايندي ياراشيپ
آق توقاي‌دا توركمن باري جم بوْلوُپ
پيراغي‌نينگ بللي گـوني گچيلدي

قيش چاغات قوْل‌لاردا اوْتوُران مالدار
سن گلن سوْنگ كؤنه يوُردوُني قالدار
حيوان انسان سنينگ عشقينگا دوشـوپ
قيرتغيچ بيتن گؤك باييرا گؤچـولدي

هر نه يازسام ‌آز دير وصفينگدان باهار
ياغميرينگ ياغديرغيل گأه شام و سحر
ياماني قوُراق‌ليق گؤرِن‌لر آيدار
شوْل سبأپدن قارا قوُمدان قاچيلدي

تأزه ييل ديپ نوروز بايرام توُتوُلدي
ييگيت‌لري اؤز يارينا چاتيلدي
ساز صحبت‌لي اوُلي ميليس‌لر قوُراپ
« سرخوْش»  بوْلوُپ جام شرابلار ايچلدي

  این مقاله را با فرمت PDF نشان بده چاپ مقاله فرستادن مقاله