SmartSection is developed by The SmartFactory (http://www.smartfactory.ca), a division of INBOX Solutions (http://inboxinternational.com)
خداقُلي آقا

 

خداقُلي آقا

 

خداقُلي آقانينگ دوْغري سگسن ايكي ياشي بوْلسا-دا، اوْنوُنگ يوزوني-گؤزوني گؤرِن‌لر داياوليق و چاقغانليق بابيندا شوُ زمانينگ ياش ييگيت‌لريندن بوُسماجاغينا گؤزي اوْنگات يتيأندير. ايلايتا خداقلي آقاني تهران يالي شهرينگ اولي چاپغي ميدانيندا گؤرِن بوْلسانگيز، اوْنوُنگ داياوليغينا اينامينگيز آرتاردي. خداقلي آقا ييلدا ايكي، كأ زمانلار اوچ آطا قوُللوُق اديپ، اوْلاري گويز و ياز آي‌لاري ايلينگ شادليق اوچين قوُران چاپغي ميدانلي توْيلارينا تاييارليق گؤريأردي. اوْل آطلاري‌نينگ آلنيني بايراق‌سيز اتمه‌جك بوْلوُپ گيجه-گونديز ياداماني آطينگ مينگي‌سيني يتيرمك اوچين اوستوندن دوشمه‌يأردي. من خداقلي آقاني دوْر ساقار آياق‌لاري سكيل تكه جوُللي كوموش قاش‌لي ايِر چكيلن آطينگ اوستونده كوموش ساپلي قامچي‌سيني اوْيناديپ باريارقا گؤروپ اوْنگا: «آط اوْزسوُن سِييس‌لرينگ اوستادي» دييپ سلام بريپ گؤروشديم. خداقلي آقا: «و عليكم السلام!» دييپ، آمان-ساغليق سوْراشاندان سوْنگ منينگ آطا ايقجام‌لي هِوِسيم بارليغيني بيليپ ايل ايچينده اوُلي بايراقلاري ايه‌له‌نن سكيلجه آدلي آطي‌نينگ وصفيندان سؤزله‌مأگه دوُردي. اوْل: «سكيلجأني اوْن بأش اؤنوپ اؤسن اوْغلانلاريمدان كم گؤرمه‌يأن» دييپ، اوْنوُنگ چاپغي ميدانيندا يوْرتماق پيكرينه دوشوپ آرا گيرنده، يانينداقي آطلارا گؤز اديپ: «من آد قازانان سكيلجه من» ديييأن يالي بوْلوُپ قوُلاقلاريني كيكرديپ، بادلانيپ، كؤنه‌لرينگ ياريشا گيتجك بدو آطي‌ تكين ديين‌لري يالي دوران يرينده قرار تاپماني دِپيرجيپ چينه‌نيپ دوروشيندان تاريپ اديبردي. خداقلي آقا بيردنكأ يتميش ايكي ييل موندان اوزال دوْغري اون ياشليغيندا مس آيغير اشكدن ييقيليپ آغلاپ اؤيه گِلنده قارّي سِييس دايي‌سي‌نينگ: «ها! حاجي قلي بوْلاسينگ بارمي، حاجي قلي بوْلسا ييلديريم تكين بوْلوُپ چاپيپ باريان آطلارينگ اوستونده ايِره يابشيرلان يالي بوْلوُپ اوْتوُراردي. سن بير چامان اشه‌گينگ اوستونده  اوْتوُرا بيلمه‌يأنگ» دييپ، قيجيت بِرن سؤزلري يادينا دوشوپ و شونگا گؤرأ ارجل‌ليك اديپ: «من حاجي قلي‌دان هم آرتيقماچ بوْلارين» دييپ، اوستاد دايي‌سي‌نينگ يانيندا آط اوْغلانليق اديپ باشلاني و دايي‌سي‌نينگ بِرن تأليم‌لري يادينا دوشوپ: «هاي- هاي بالام، بير نأچه‌‌سي من هم سِييس دييپ نه بير ييلدام آطلاري ضايالايارلار. هاني سيد نار آغيزينگ آلجا آطي و يا اوْري شاهيرينگ قارا دِپِل آطي‌ يالي آطلار بارمي، اولار قارّيسا‌-دا مايريلمازدي» دييپ، اؤنگكي اؤتن اوستاد سِييس‌لري ماغتاماغا دوُردي: «يؤنه بوْلسا حاضركي زماندا سكيلجه، قاصير، مدرّسي، چالاو، هلاكو، بوْزجا يالي آطلار قاوي يوْرتسا-دا سكيلجه بيلن مدرسي‌دن بيله‌سي مايريليپ ميداندان چيقدي» دييپ سؤزونه دوام بردي. خداقلي آقانينگ آغزي گوررونگه قيزيپ بيردنكأ مرحوم بوْلان آتچي‌ييلقي‌لي گؤكلنگ دوستي آدنا صحت خان و آتاباي ايلينه باش بوْلوُپ كوممد قاوسا كدخداليق ادن ساتانلاق ساري و اوْنوُنگ اگيندشي آنّا قاصير و جافارباي‌دان موخاد نجاري‌نينگ توركمن آط‌چاپغي‌سينا ادن خيذماتلاريني ماغتاماغا دوردي. خداقلي آقانينگ دردلي يوره‌گي‌نينگ گوررونگي
قوُتارماسا-دا، گونونگ شؤهله‌سي قوتاريپ، ايكيندي نماز واغتي بوْلماغي بللي بوْلدي، سبأبي خداقلي آقا بير الي‌نينگ آياسيني مانگلايينا قوْيوُپ گونه قارشي سر اتدي-ده: «بالام! نماز واغتي بوْلوُپدير. مِنأ متجيده گيتجك» دييپ، خوْشلاشماغي بيلن مني اؤز پيكرينده يالنگيز قالديردي.

خداقلي آقا بير مونگ اوچ يوز قيرق يدينجي شمسي ييلدا اولي پايتختيميز تهراندا آطي چاپيپ باريارقا قارپيپ ييقيلاندا، بأش قاپيرغاسي دؤوولمه‌گي سبأپلي، انچه‌مه گون‌لر كسلخانادا ياتيپ، ياراسي توْغتاماقا «اؤلسم-ده آطينگ اوستونده اؤله‌يين» دييمك سوزي بيلن آطا مينيپ، بيرينجي بايراقي ايه‌له‌‌ننيني اوُلي قازيت‌لر هم: «بيز بو قارّي اوستادا قوُوانياريس» دييپ صوراتيني يابشيريپ يازان‌لاري يادلاردان چيقمان آط‌چاپغي و سِييس‌لر تاريخيندا اولي شاياد دير، ديپ يادلاسم گليأر.

 

  این مقاله را با فرمت PDF نشان بده چاپ مقاله فرستادن مقاله